Alle a querre ches betes.kar

Déjà qu'in avot des tchiens
Des poul's et pis des lapins
Sans compter c'qu'i'a dins l'maison
Les moniaux et les pichons
I v'là pas qu'all' a ram'né
Un vieux cat qu'all' a trouvé
I s'rot p'tête temps qu'all' arrêt'
I'a pus d'plach' ed s'artourner

All' l'appell' min bieau minou
Alors qu'i'est laid comm' un pou
All' le caress' i'est heureux
I'est contint i boug' es queue
Je n'sais pas si cha vient d'li
Mais d'pis l'temps qu'il est ichi
Ej' n'arrêt' pas de m'gratter
Cha m'déminch' de l'têt' aux pieds

J'sais bien qu'all' a querr' les bêtes
Ch'est quand mêm' pas ein' raison
Pour qu'all' ramèn' tout c'qui traine
Tout c'qu'all' trouve dins l'corons

Faut vir' à l'heur' du midi
In dirot eun' colonie
Y'a pas besoin d'les app'ler
In les vot tous débarquer
I vient minger dins m'nassiett'
Si j'l'arpouss' d'eun' tit' tapett'
Alors là quoi qu'j'intinds pas
J'ai martyrisé sin cat

I fait quair' tous les bib'lots
Il arrache les rideaux
I fait ses griff's tout partout
Des meub's qui coût'nt un prix fou
El soir quand ej' vais m'coucher
J'vous dis pas el cirqu' que ch'est
Allongé au bout du lit
Y'a ch'cat mais ches tchiens aussi

J'sais bien qu'all' a querr' les bêtes
Mais j'aim'ros y'a des momints
Ete tous les deux têt' à tête
Sans sin cat et sans ses tchiens

I va fair' ses p'tits besoins
Dins l'gardin ed nou voisin
Après all' va s'étonner
Que ch't'homm' i nous tir' sins nez
Ch'est vrai qu'ch'est pas régalant
Surtout quand in met pas d'gants
In déduisant ses carott's
Ed mett' es' main dins eun' crott'

Quand i passe eun' auto
Ou bien quéqu'un à vélo
Dins l'journée cha pass' incor'
Mais dins l'nuit quand tout l'mond' dort
J'vous dis pas l'boucan qu'cha fait
Quand i s'mett' tous à gueuler
Pourtant les bêt's réunies
Cha vaut pas m'femm' quand all' crie

J'sais bien qu'all' a querr' les bêtes
Mi qui pinsos m'arposer
Et profiter de m'retraite
J'ai les bêt's à m'occuper

J'sais bien qu'all a querr' les bêtes
A tel point que j'dis toudis
Que si in arvient sur terre
J'veux ête eun' bêt' mi aussi